Rom 9 | DWW | STEP | Taugu Yesu Keriso matane yà riuriu kauana, be nam ama kaikaiyovuna. Arua Babau nopogue nama e riuriueguna.

Romans 9

Mamaitua be Israel banegidima

1 Taugu Yesu Keriso matane yà riuriu kauana, be nam ama kaikaiyovuna. Arua Babau nopogue nama e riuriueguna. 2 Israel banegidima nam adi waisumaḡa, vutuna aubainama taugu nopogue èi nuaboya da èi nuaboya kauana, be è noḡoti da Mamaitua taugu sibo ya raukivi gewegewegu be taudi sibo yai yawasanidina. 4 Baninama taudi Mamaitua ya vinedina da tauna natunatunama be taudi neneḡarinama a kita be na saugama ḡarodie ya boruna. Taudi Mousis na tarawatuma a paḡo be tempol nopone ta tapataparorona, be Mamaitua ya riuedina da tokare ei yawasanidina. 5 Be taudi ḡarodie dede pakanama banegidima, ^{▼▼Dede pakanama banegidima inam: Eibraham, Aisik be Jeikob.} be inam damne Yesu Keriso ya tubuḡana, tauna vutuna Mamaitua, be raḡan matabuna ta kaikai suḡu nonoḡena! Inam riukaua.

Aitauḡa Mamaitua na damma nopone?

6 Taugu yà riuriuna da Mamaitua na saugama nam i kavena. Israel banegidima nam matabudi Mamaitua na dam. 7 Avedi da taudi Eibraham natunatunama, yaḡoro nam matabudi Mamaitua na seda, ibewa. Mamaitua Eibraham umanama ya riuena, “Aisik na dame taugu tokare am sedama è sausaugemna yà utemna.” 8 Inam baninama umanama: Avedi da taudi Eibraham natunatuḡominama, yaḡoro taudi nam Mamaitua natunatuna, be aitauḡa Mamaitua na saugama tauwai sumaḡenama, taudi inam riukaua Mamaitua natunatunama. 9 Mamaitua na saugama Eibraham ḡarone inam umanama ya riuna, “Taugu yau raḡanima è boruborue taugu yà yovo munaḡana, yodibe Sera gomana tauḡominama tokare e tikana.”

10 Be teneḡinama nama Rebeka ḡarone. Rebeka na sedama tautauḡomidima tamedima tenaḡa Aisik, tauda mate tamadama. 11 Be Rebeka muriḡa da seda raḡaraḡa e tikedi da yawasana veredi bo gewegewedima ta voiedina, be noḡone Mamaitua Rebeka umanama ya riuena: “Gomana tautuaḡa tokare tasinama ḡarone ei taunoyana.” Mamaitua nama ya riuna, inam tauda sibo tè kataie da Mamaitua na ḡoane banaga e vinevinedina, be nam adi noyama debane. 13 Vutuna aubainama girugiruminama porane umanama ya riuna, “Jeikob nuaguma e paḡopaḡona be Iso è tuaḡaiena.”

14 Be yodi nema tà riu bako? Mamaitua nam didimana banegina, bo? 15 Mamaitua Mousis umanama ya riuena,

“Taugu yau raunuatoima banaga yà ḡoeḡoena nama yà raunuatoiena,
be yau raukiviverema banaga yà ḡoeḡoena nama ḡarone yà raukivi verena.”
16 Vutuna aubainama banaga yawasana ta paḡona, be nam adi ḡoane bo adi noyama veredima aubaidi, ibewa, be Mamaitua taunaḡa e ḡoeḡoena nama e raukivi verena ḡarodie.

17 Be guyau Pero ḡarone ko kita. Mamaitua tauna ḡarone ya riuna umanama, “Taugu è voiem da guyau kuya tubuḡana, inam taugu yau rewapanama ḡarome yai maḡatari da dobu matabuna ta kita be isaguma ta kaisuḡuna.” 18 Vutuna aubainama Mamaitua na raukiviverema banaga e ḡoeḡoena, nama ḡarone e raukiviverena. Be mate Mamaitua e ḡoeḡoena nama, banaga noponama e kawa badona.

19 Be tokare banaga ḡesaumima umanama ko riueguna, “Deḡoda Mamaitua na yawasanama nama, aba aubainama tauna e riuriuna da tauma gewagewa banagimai? Tauda nam teneteneḡina da na ḡoanama tài ḡake.”

20 Tam am rewapanama aba da Mamaitua e giugiu be kwa riuute munaḡe? “Gurewa nam tokare aitau tauvoienama e riuena: Aba aubainama umanama kitaguma kuya voiegu?” 21 Gurewa tauvoienama doḡa teneḡinama e paḡo be na ḡoane nama gurewa verenama be kamai guregurewa e voivoiedina. 22 Be inam kauinama teneḡinama nama. Mamaitua guyau Pero be Ijipt banegidima ya vinedi da ḡarodie na medima be na rewapanama ei maḡatarina. Be avedi da Mamaitua ya vinedina da taudi sibo a gurina, be tauna yaḡoro mareḡa ewai rauriedina. 23 Be banaga ḡesaudima ya vinedina da taudi neneḡarinama maumaurinama tokare a paḡona. Vutuna aubainama Mamaitua na raukiviverema be na rewapanama taudi ḡarodie yai maḡatarina. 24 Be inam banegidima inam tauda, tauna Jius be eteni nopodie ya vinedana.

25 Maika Mamaitua peroveta Osea ya riuriuena nama,

“Taugu tokare eteni banegidima yà vinedi
be yà voiedi da taudi yau banagama.
Be taudi nuaguma ta paḡona,
avedi da yodi nuaguma nam tima paḡopaḡona.”
26 Be mate Osea ya riuena,

“Deḡo è riuedina, ‘Taumi nam taugu yau banaga’,
yodi tokare yà riuedina, ‘Taumi Mamaitua miamia nonoḡinama natunatunama.’”
27 Be peroveta Aisaia Israel aubaina ya riuna umanama,

“Avedi da Israel banegidima sievidima maika gimori gerese,
be raubisaḡa tokare ei yawasanidina.
28 Baninama Mamaitua na ogama ya tarataraḡina nama,
tokare e voia makaie be e voia rovona.”
29 Inam maika Aisaia kaite ya vatona,

“Deḡoda Bada wairewapana vavasaḡinama banaga raubisaḡa sibo nam i gosedi,
tauda tokare Sodom be Gomora banegidima tè ruvedi be tè guri rovona.” ^{▼▼ Sodom be Gomora adi gututuma ko sievidina. (Genesis 19:1-29)}

Israel banegidima nam waisumaḡa ḡarodie

30 Be yodi tà kita da eteni banegidima avedi da didimana nam ti wanewanena, be yaḡoro Mamaitua adi waisumaḡe ya kawa didimanidina. 31 Be Israel banegidima taudi didimana nam ti banavina, baninama taudi didimana tarawatue a wanewanena aubainama. 32 Aba aubainama didimana nam ti banavi? Baninama taudi a noḡoti da adi noyama veredie kabe didimana ta banavi, be nam waisumaḡe. Taudi yeku ^{▼▼‘Yeku’ inam Yesu Keriso.} adi kaba saḡaivitarema a saḡai vitarena. 33 Ya girugirumina nama:

“Ko kitana, taugu Saionma yeku yà boruboruna,
be vutuna banaga e voiedi da ta saḡai vitare be ta bekuna.
Be aitau uma yekunama ewai sumaḡena,
tauna tokare nam tunimayaḡe e mia.”